Ein del brukarar av NRKbeta har spurt om kvifor NRK ikkje lagar eigne appar for Windows Phone og andre Microsoft-plattformar. Vi har svart kort i kommentarfelta til no. Her kjem det lange svaret!
NRK TV og NRK Radio er i dag tilgjengeleg på ei lang rekkje ulike plattformar.
Primærtenestene vår er nettversjonane tv.nrk.no og radio.nrk.no. Nettsidene fungerer på så og seie alle plattformar, og vi har brukt svært mykje tid på tilpassingar slik at dei skal fungere «over alt».
For enkelt andre veldig store plattformar lagar vi eigne løysingar i tillegg. Dette reknar vi som sekundærtenester – primærtenesta er framleis nettversjonen. I dag har vi appar for iOS (iPhone og iPad), Android, Apple TV, Chromecast og fem store smart-TV-ar. Om kort tid kjem vi med ein eigen app for Android TV.
Når lagar vi ein eigen app for ein plattform?
Utgangspunktet vårt er at det ikkje er vår rolle å vere teknologidrivarar. Vi utviklar altså ikkje tilbod for små oppstartsplattformar; vi skal vere til stades der publikum er.
I utgangspunktet lagar vi berre appar for plattformar som er i vanleg bruk blant nordmenn. Vi har altså ikkje som mål å vere fyrst (sjølv om vi er det av og til), men at vi skal vere til stades på plattformar som er mykje brukt blant nordmenn.
Vi kan ikkje lage appar for alle plattformar, mest fordi det fører til enorme vedlikehaldskostnadar. Vurderinga er altså om ein skal ha rask utvikling på få plattformar, eller treig utvikling på mange plattformar. Akkurat no prøver vi å ha ein balanse: Eit rask utvikla primærprodukt (tv.nrk.no og radio.nrk.no) og eigne produkt for dei mest brukte andre plattformane.
Korleis er bruken av NRK TV i dag?
I perioden 1. januar til 1. mai 2015 var det 56 millionar økter (sesjonar) i nettversjonen og mobilappane til NRK TV (altså ikkje inkludert Apple TV, Smart-TV og Chromecast).
Du ser dei seks største operativsystemfamiliane i grafen. Om vi skal dele opp operativsystemversjonar hadde 23 % Windows 7 og 5 % Windows 8.
Det ein ser av statistikken vår (og alle andre store norske nettstader) er at Windows er dominerande på desktop; at Android-bruken er forbausande låg og at iOS-bruken er forbausande høg (trass i at det er mange fleire Android-telefonar blant nordmenn enn iPhone). Ein stor del av iOS-bruken hos oss er barn som har arva dei gamle iPad-ane til foreldra sine.
Universal Apps
Nokre av NRKbeta-lesarane har føreslått at vi skal lage Universal Apps for Windows, Xbox og Windows Phone. Her kjem ei litt teknisk forklaring om kvifor Universal Apps til no ikkje har vore interessant for NRK TV.
Universal Apps kom i Windows 8 og var meint å opne for at vi kan lage «éin» app for fleire plattformar (Windows Phone, desktop-Windows, brett o.s.v., men ikkje Xbox). Ein må framleis lage eitt design per plattform og ein må byggje ei fil per plattform appen skal fungere på. D.v.s. at appane ikkje er så veldig universelle. Dei fleste brukarane av Windows 8 slår av Tiles-funksjonen og bruker «klassisk Windows»; bruken av appar på desktop-Windows har difor vore svært låg både i Noreg og USA (som er dei einaste stadene eg har sett statistikk frå).
I Windows 10 blir Universal Apps meir universelle, med felles kodebase for Windows, Windows Phone og Xbox. Designet skalerer etter skjermstorleik og det er felles API for telefon/pc/box. Windows 10 og Windows Phone 10 er framleis i technical preview; vi veit ikkje når W10 blir offisielt lansert og heller ikkje kor moge systemet er før vi har testa det i praksis. Det vi kanskje er mest spente på er om app-bruken på desktop vil auke i W10.
Universal Apps har til no ikkje hatt støtte for Xbox, men dette kjem med Windows 10. Vi har veldig lyst til å lage ein eigen app for Xbox, men til no har det vore for arbeidskrevjande målt opp mot tal brukarar. Vi kryssar fingrane for at det blir betre no!
Microsoft har annonsert at dei vil opne for porting av appar frå iOS og Android. Vi er spente på kor enkel denne porteringa faktisk vil vere, til no ser det ut til at appar med mykje spesiallaga design i praksis må lagast frå botn av. Vi kjem til å teste i løpet av sumaren.
For å oppsummere: Universal Apps kan bli viktig med Windows 10, men akkurat no er Universal Apps lite brukt og vil ikkje gjere oss i stand til å nå dei viktigaste Microsoft-plattformane.
Vi er Microsoft-tilhengjarar!
Nesten alle tenestene til NRK TV og NRK Radio er laga på Microsoft-teknologi. Vi utviklar i .Net, og API-a og nettsidene våre ligg i Microsoft Azure.
Vi bryr oss minst like mykje om brukarar på Microsoft-plattformar som dei andre brukarane våre; men når vi skal prioritere kva plattformar vi skal utvikle eigne løysingar for er vi nøydd til å prioritere plattformar med mange brukarar.
Ting kan endre seg
Akkurat no har vi altså ingen planar om å lage eigne appar for Windows Phone, men dette kan godt endre seg i framtida. Vi fylgjer med på kor mange telefonar som finst, og om bruken hos oss og andre norske nettstader aukar.
Dersom mange nordmenn vel å ta i bruk Windows Phone kjem vi sjølvsagt til å lage spesialsydde tenester for denne plattformen òg. Inntil vidare er det primærtenesta vår, tv.nrk.no, som er tilbodet på Windows Phone.
Har du Windows Phone? I så fall blir vi veldig glade for tilbakemeldingar om kva du trur blir betre i ein eigen app samanlikna med nettsidene slik dei er i dag.